Budki's World: GHONSLA- A SHORT STORY IN URDU

Budki's World: GHONSLA- A SHORT STORY IN URDU

رضاءالحق صدیقی
مظہریات سے جمالیات تک
" واہ واہ" خوب باندھا ہے کی صدا نےاس کے دل کی بے ترتیب ردھم کو متوازن کر دیا تھا.اب اس کے چہرے پر سرخی بکھرتا لہو گھبراہٹ کی بجائے جوش کا رنگ لئے ھوئے تھا.
نوجوان شاعر جسے مشق سخن کا آغاز کئے زیادہ عرصہ نہ ہوا تھا اپنی خوب صورت سی رومانوی غزل پیش کر کے واپسی کے لئے سٹیج سے مڑا، تھوڑا سا لڑکھڑایا اور پھر جوش بھری دبی دبی مسکراہٹ کے ساتھ دیگر ساتھیوں میں جا بیٹھا.
یہ منظرنامہ ہے گورنمنٹ کالج ساھیوال کی ادبی تنظیم بزم سخن کا، جس کی ہفتہ وار ادبی نشت میں اس نوجوان شاعر نے شرکت کا آغاز کیا تھا.
رومانوی شاعری کے بین السطور عشق حقیقی یا عشق مجازی جلوہ افروز ہو ، یہ ضروری تو نہیں. نرگسیت بھی رومان کی وجہ تسمیہ ہوسکتی ہے، لڑکپن کی زیادہ تر شاعری نرگسیت کی دین ہوتی ہے. نوجوان شاعر جس نے ایک چھوتے مضافاتی شہر سے ایک تھوڑے بڑے مضافاتی شہر مین حصول علم کے لئے ہجرت کی تھی نرگسیت آمیز رومان کا علمبردار شاعر تھا. اس نوجوان شاعر نے بلا شبہ خود کو آغاز سفر میں رومانویت کی گرفت میں دے دیا تھا لیکن حیات شناسی اور وقت کی رفتار نے اس کے لئے نئے راستے متعین کئے.
اس نے اپنی فکر کی جہات کے لئے اپنے آپ کو محدود نہیں کیا اس نے فکر کو جلا بخشنے کے لئے نئے راستے تراشے.
اس نے سوسائٹی کی زود فراموشی و شکست و ریخت اور تصورات کی پامالی سے لے کر تمام تغیرات کا مکمل منظرنامہ اپنی شاعری میں پیش کیا. وقت کے لمبے سفر نے اسے نرگسیت کی گرفت سے نکال کر اس مقام پر لا کھڑا کیا جو زندگی سے بھرپور کسی بھی شخص کے اندر پیار کی رت جگا دیتا ہے. اس پیار کی کہانی کا تانا بانا بنتے ہوئے کل کا نوجوان شاعر آج کا صاحب طرز کہنہ مشق شاعر قاری کو اپنی جگہ لا کھڑا کرتا ہے. یہی وہ مقام ہے جہاں یہ شاعر اپنے اندر مظہریات سے جمالیات تک کے تمام زاوئے اپنے قاری پر کھول دیتا ہے. شاعری صرف عرض ہنر کا نام نہیں. یہ ظاہر سے باطن اور باطن سے ظاہر کے سفر سے مستعار ہے.
تو فقط سینہ و دل ہے نہ فقط عارض و لب
سخن آغاز کرے کوئی کدھر سے پہلے
مجھ گمنام سے پوچھتے ہیں فرہاد و مجنوں
عشق میں کتنا نام کمایا جا سکتا ہے
پھٹا پرانا خواب ہے میرا پھر بھی تابش
اس میں اپنا آپ چھپایا جا سکتا ہے
ہمارے جیسے وہاں کس شمار میں ہوں گے
کہ جس قطار میں مجنوں کا نام آخری ہے
عباس تابش کے نام سے شہرت پانے والے اس شاعر نے پہلی ہجرت حصول علم کے لئے میلسی سے ساھیوال تک کی، ساھیوال مجید امجد کا شہر، دوسری ہجرتابش نے حصول روزگار اور حصول نام کے لئے کی اور اس ہجرت نے اسے کنویں سے سمندر میں لا پھینکا. دستور زمانہ کی طرح ہونا تو یہ چاہئے تھا کہ لاھور جیسے ادب کے سمندر کی کوئی لہر ریت پر لکھے ہوئے نام کی طرح اسے بھی بے نام کر دیتی لیکن عباس تابش کی فکری وسعتوں اور اضافتوں کی بنت کی تمام تر جمالیاتی پرتوں نے اسے نا صرف نےنام ہونے سے بچایا بلکہ اس کا نام اس فہرست میں شامل کر دیا جو نامور ہوتے ہیں.
کس طرح لوگ چلے جاتے ہیں چپ چاپ
ہم تو یہ دھیان میں لاتے ہوئے مر جاتے ہیں
گھر پہنچتا ہے کوئی اور ہمارے جیسا
ہم ترے شہر سے جاتے ہوئے مر جاتے ہیں
یہ محبت کی کہانی نہیں مرتی لیکن
لوگ کردار نبھاتے ہوئے مر جاتے ہیں
ہم ہیںوہ ٹوٹٰی ہوئی کشتیوں والے تابش
جو کناروں کو ملاتے ہوئے مر جاتے ہیں
پاس ہی ڈوب رہی ہے کوئی کشتی تابش
خود نہیں بچتے اگر اس کو بچانے لگ جائیں
سوسائٹی میں اقدار کی شکست و ریخت کا اس سے بہتر نوحہ اس سے پہلے نہیں کہا گیا.
تابش کو تخلیقی زبان پر بلاشبہ قدرت حاصل ہے اس کا کہنا ہے کہ
خلوت خاص میں بلوانے سے پہلے تابش
عام لوگوں میں بہت دیر بٹھایا گیا میں
مجھ ایسے کوہ کن کو رفتگان کا رنج ہے تابش
میں پتھر کاٹ کر نہریں نہیں کتبے بناتا ہوں
میں ادب کا ادنی سا قاری ہوں. اسی ناطے یہ سمجھتا ہوں کہ تابش کے کلام میں ایک خاص غنا کا عنصر ہے. اس کے اشعار پڑھنے سے ایک کیفیت کا احساس ہوتا ہے، ایک وجد کا عالم طاری ہونے لگتا ہے ،ایسا محسوس ہوتا ہے جیسے کوئی اچھوتی بات کہہ دی گئی ہے. اس کے کلام کی زیب وزینت میں تغزل کا بڑا حصہ ہے اور اس تغزل نے اس کی غزل کو مقبول رنگ عطا کیا ہے.
تابش کا یہ شعر دوہراتے ہوئے اپنی بات ختم کرتا ھوں
مجھ ایسے کوہ کن کو رفتگان کارنج ہے تابش
میں پتھر کاٹ کر نہریں نہیں کتبے بناتا ہوں
یہی لہجہ اردو غزل میں تابش کو منفرد بناتا ہے.
Raza Ul Haq Siddiqi
Cell: 03334254489
E.Mail: raza_siddiqi@hotmail.com

علی پور کا بیلی

علی پور کا بیلی


اور شہروں میں اک عمر گذری پھر بھی تنہا تنہا ہیں
آج وہ یاد آتے ہیں لمحے نکلے تھے جب گاوں سے
ھجرت ، نقل مکانی یا ایک جگہ سے دوسری جگہ منتقلی ازل سے انسان کو ودیعت کر دی گئی.سب سے پہلی جبری ہجرت تخلیق کائنات کے فورا بعد ھوئی جب آدم نے اپنے خالق کی حکم عدولی کی جس پر آدم کو حکم دیا گیا کہ "اب تم سب یہاں سے اتر جاؤ، تم ایک دوسرے کے دشمن ہو اور تمہیں ایک خاص وقت تک زمین میں ٹہرنا اور وہیں گذر بسر کرنا ہے."
ھجرت دنیاوی ایک بار پھر وقوع پذیر ہوئی جب منکرین خدا کفار مکہ نی محبوب خداوندی پر عرصہ حیات تنگ کر دیا پس میشت خداوندی یہی تھی کہ محبوب خدا، مکہ سے ہجرت کر جائیں سو مکہ سے حبشہ اور آخر میں مکہ سے مدینہ کے سفر مین ظہور پایا.
ھجرت کرنا ہر روح میں عام طور پر اور مسلمانوں میں خاص طور پر ودیعت شدہ ہے. تقسیم ہند کے اعلان کےنتیجہ میں لاکھوں افراد کی نقل مکانی نے ھجرت کو نیا مفہوم بخشا. اس خون آلود ھجرت نے اردو نظم اور نثر کو درد کی کیفیات سے آشنا کیا.
اردو شاعری ، انسان کے عقل و شعور کے اظہار میں سے ایک ہے. ھجرت کا یہ درد آج بھی اردو شاعری میں موضوع سخن ہے.
پنجاب کےشہر مظفرگڑھ کے مضافاتی علاقے علی پور سے تحصیل علم اور رزق رسانی کے لئے لاھور آنے والے قائم نقوی کے ہاں ھجرت کا استعارہ اپنی بھرپور معنویت کے ساتھ ابھر کر سامنے آیا ہے.
منزل پانے کی ان دیکھی خواہش میں
اک مدت سے ھم نے اپنا گھر نہیں دیکھا
قائم نقوی کے ہاں سفر علامت ہے ھجرت کے استعارے کی.
کتنے بیلوں کی خاک چھانی ہے
ہم نے کتنے چناب دیکھے ہیں
دربدر کی خاک چھانتا قائم نقوی اپنے تخلیقی سفر میں صراط مستقیم پر چل رہا ہے. زمانے کی ھجرتیں اس کے تخلیقی سمت تبدیل نہ کر سکیں.
ھجر موسم وصال لمحوں میں
ھمسفر ایک ہنر بنایا ہے
شاعری میں الفاظ کا ذخیرہ ، لاشعور سے شعور میں سفر کرنے والے واقعات اقر تصویر کشی بقول ٹی ایس ایلیٹ، فنی اور تخلیقی سفر ہے. قائم نقوی کے فن کا ہنر انہی چیزوں کے گرد گھومتا ہے.
حقیقی معنوں میں ھجرت قائم نقوی کے زاویہ نظر کا اندرونی خدوخال ہے.
قائم نقوی کے ناقدین نے اسے دھیمے لہجے کا شاعر قرار دیا ہے لیکن میرا ماننا ہے کہ قائم اپنے شہر سے اکھڑ کر جس اذیت سے گذرا ہے اب اپنی بکھری ہوئی
ذات کو سمیٹتے ہوئے باآواز بلند کہہ رہا ہے
ہر ذھن میں کب مجھ سی شوریدہ سری ہوگی
جو بات بھی ہونٹوں سی نکلے گی، کھری ہوگی
قائم کی شاعری میں ہمہ جہتی ہے، ہر جہت کا اپنا رنگ ہے. معاشرے کی ناانصافی ، بے ثباتی اوربے حسی بالآخر انقلاب کی صورت امید کی کرن بن کر ابھرتی ہے.
نظم " اے اسرافیل آ " میں قائم کا کہنا ہے
تمہیں خبر ہے ہم اپنی آنکھوں
کے رت جگوں میں پرے پڑے برف
ہو چکے ہیں
ہم اپنے رنگوں میں کھو چکے ہیں
تمہیں خبر ہے ہم اپنی پہچان کھو چکے ہیں
اس ایک نقطے پہ متفق اور منتظر
ہیں کہ کوئی آئے ،صور پھونکے
ایک اور جگہ قائم کا کہنا ہے کہ
میں اس سنگین سناٹے میں قائم
کسی طوفاں کی آہٹ سن رہا ہوں
بےحسی کی مثال پیش کرتے ہوئے قائم نقوی کا کہنا ہے
ایک عمر سے ہم تو
خامشی سے رہتے ہیں
دیکھتے ہیں ہم سب کچھ
اور کچھ نہیں کہتے
وقت کی عدالت میں
بول دیں جو سچ ہم بھی
دار پر لٹک جائیں
چپ رہے تو مر جائیں
ایک حشر اندر ہے
باہر بھی ہے اک محشر
بند ہونٹ کھولے کون
سچ یہاں پہ بولے کوں
شاعری کے یہ تمام پہلو اپنی جگہ مگر ہجرت کا استعارہ قائم نقوی کی ہر جہت پر بھاری ہے.
منزل پانے کی ان دیکھی خواہش میں
اک مدت سے ہم نے اپنا گھر نہیں دیکھا
تلاش رزق میں ہم بھی چلے تھے
مگر گھر لوٹ کر آئے نہیں ہیں
تحریر: رضاالحق صدیقی



Raza Ul Haq Siddiqi
Cell: 03334254489
E.Mail: raza_siddiqi@hotmail.com

مرزا اسداللہ غالب

ہر ایک بات پہ کہتے ہو تم کہ تو کیا ہے
تمہیں کہو کہ یہ اندازِ گفتگو کیا ہے
نہ شعلے میں یہ کرشمہ نہ برق میں یہ ادا
کوئی بتاؤ کہ وہ شوخِ تند خو کیا ہے

یہ رشک ہے کہ وہ ہوتا ہے ہم سخن تم سے
وگرنہ خوفِ بد آموزی ِ عدو کیا ہے

چپک رہا ہے بدن پر لہو سے پیراہن
ہمارے جَیب کو اب حاجتِ رفو کیا ہے

جلا ہے جسم جہاں، دل بھی جل گیا ہوگا
کریدتے ہو جو اب راکھ جستجو کیا ہے

رگوں میں دوڑتے پھرنے کے ہم نہیں قائل
جب آنکھ سے ہی نہ ٹپکا تو پھر لہو کیا ہے

وہ چیز جس کے لیے ہم کو ہو بہشت عزیز
سواۓ بادۂ ِ گلفامِ مشک بو کیا ہے

پیوں شراب اگر خم بھی دیکھ لوں دو چار
یہ شیشہ و قدح و کوزہ و سبو کیا ہے

رہی نہ طاقتِ گفتار اور اگر ہو بھی
تو کس امید پہ کہیے کہ آرزو کیا ہے

ہوا ہے شہ کا مصاحب پھرے ہے اتراتا
وگرنہ شہر میں غالب کی آبرو کیا ہے

۔۔۔۔۔۔۔۔۔۔۔۔۔۔۔۔

کب وہ سنتا ہے کہانی میری
اور پھر وہ بھی زبانی میری
خلشِ غمزۂ خوں ریز نہ پوچھ
دیکھ خوں نا بہ فشانی میری

کیا بیاں کر کے مرا روئیں گے یار
مگر آشفتہ بیانی میری

ہوں ز خود رفتۂ بیداۓ خیال
بھول جانا ہے نشانی میری

متقابل ہے مقابل میرا
رک گیا دیکھ روانی میری

قدرِ سنگِ سرِ رہ رکھتا ہوں
سخت ارزاں ہے گرانی میری

گرد بادِ رہِ بے تابی ہوں
صرصرِ شوق ہے بانی میری

دہن اس کا جو نہ معلوم ہوا
کھل گئی ہیچ مدانی میری

کر دیا ضعف نے عاجز غالب
ننگِ پیری ہے جوانی میری

۔۔۔۔۔۔۔۔۔۔۔۔

چاہیے اچھّوں کو ، جتنا چاہیے
یہ اگر چاہیں تو پھر کیا چاہیے
صُحبتِ رنداں سے واجب ہے حَذر
جاۓ مے ، اپنے کو کھینچا چاہیے

چاہنے کو تیرے کیا سمجھا تھا دل
بارے اب اِس سے بھی سمجھا چاہیے

چاک مت کر جیب ، بے ایامِ گُل
کُچھ ادھر کا بھی اشارہ چاہیے

دوستی کا پردہ ہے بیگانگی
منہ چُھپانا ہم سے چھوڑا چاہیے

دُشمنی نے میری ، کھویا غیر کو
کِس قدر دُشمن ہے ، دیکھا چاہیے

اپنی، رُسوائی میں کیا چلتی ہے سَعی
یار ہی ہنگامہ آرا چاہیے

منحصر مرنے پہ ہو جس کی امید
نااُمیدی اُس کی دیکھا چاہیے

غافل ، اِن مہ طلعتوں کے واسطے
چاہنے والا بھی اچھا چاہیے

چاہتے ہیں خُوبرویوں کو اسد
آپ کی صُورت تو دیکھا چاہیے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہر قدم دورئِ منزل ہے نمایاں مجھ سے
میری رفتار سے بھاگے ہے ، بیاباں مجھ سے

درسِ عنوانِ تماشا ، بہ تغافلِ خُوشتر
ہے نگہ رشتۂ شیرازۂ مژگاں مجھ سے

وحشتِ آتشِ دل سے ، شبِ تنہائی میں
صورتِ دُود ، رہا سایہ گُریزاں مجھ سے

غمِ عشاق نہ ہو ، سادگی آموزِ بُتاں
کِس قدر خانۂ آئینہ ہے ویراں مجھ سے

اثرِ آبلہ سے جادۂ صحراۓ جُنوں
صُورتِ رشتۂ گوہر ہے چراغاں مجھ سے

بیخودی بسترِ تمہیدِ فراغت ہو جو
پُر ہے سایے کی طرح ، میرا شبستاں مجھ سے

شوقِ دیدار میں ، گر تُو مجھے گردن مارے
ہو نگہ ، مثلِ گُلِ شمع ، پریشاں مجھ سے

بیکسی ہاۓ شبِ ہجر کی وحشت ، ہے ہے
سایہ خُورشیدِ قیامت میں ہے پنہاں مجھ سے

گردشِ ساغرِ صد جلوۂ رنگیں ، تجھ سے
آئینہ دارئ یک دیدۂ حیراں ، مُجھ سے

نگہِ گرم سے ایک آگ ٹپکتی ہے ، اسد
ہے چراغاں ، خس و خاشاکِ گُلستاں مجھ سے

۔۔۔۔۔۔۔۔۔۔۔۔۔۔۔۔

نکتہ چیں ہے ، غمِ دل اُس کو سُنائے نہ بنے
کیا بنے بات جہاں بات بنائے نہ بنے

میں بُلاتا تو ہوں اُس کو ، مگر اے جذبۂ دل
اُس پہ بن جائے کُچھ ایسی کہ بِن آئے نہ بنے

کھیل سمجھا ہے کہیں چھوڑ نہ دے ، بھول نہ جائے
کاش یُوں بھی ہو کہ بِن میرے ستائے نہ بنے

غیر پھرتا ہے لیے یوں ترے خط کو کہ اگر
کوئی پُوچھے کہ یہ کیا ہے ، تو چُھپائے نہ بنے

اِس نزاکت کا بُرا ہو ، وہ بھلے ہیں ، تو کیا
ہاتھ آویں ، تو اُنھیں ہاتھ لگائے نہ بنے

کہہ سکے کون کہ یہ جلوہ گری کس کی ہے
پردہ چھوڑا ہے وہ اُس نے کہ اُٹھائے نہ بنے

موت کی راہ نہ دیکھوں ؟ کہ بِن آئے نہ رہے
تم کو چاہوں کہ نہ آؤ ، تو بُلائے نہ بنے

بوجھ وہ سر سے گرا ہے کہ اُٹھائے نہ اُٹھے
کام وہ آن پڑا ہے کہ بنائے نہ بنے

عشق پر زور نہیں ، ہے یہ وہ آتش غالب
کہ لگائے نہ لگے اور بُجھائے نہ بنے

حمد باری تعالٰی

حمدِ باری تعالٰی

قیصرنجفی

رونقِ روئے حرف ہےحسن خیال کے سبب

حسنِ خیال ہے ترے ذکر جمال کے سبب

جز تیرے کائنات میں ہے ایسا مہرباں کہاں

پیش آئے التفات سے جو عرضِ حال کے سبب

یہ وحش و طیر اے خدا،ہیں سچے مدح خواں ترے

کرتے نہیں ثنا تری اپنے کمال کے سبب

چاہے جو تو تو ذرے سے پھوٹیں شعاعیں مہر کی

کیا کیا بغاوتیں نہ تھیں کیا رعونتیں نہ تھیں

آ پ اپنی موت مر گئیں تیرے جلال کے سبب

کرتا ہوں بے زبانی کی میں تو زباں میں حمدِ رب

قیصر زبان گنگ ہے رنج و ملال کے سبب

جشنِ فرحت

امارات کاقومی د ن

اردومنزل کے زیر اہتمام مشاعرہ

http://urdumanzil.com/2009/um_mushaira/index.html

اردو منزل کل امارات مشاعرہ

اردو منزل کل امارات مشاعرہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان سو شیل سنٹر شارجہ میں اردو منزل کل امارات مشاعرہ بیادِ قائد ِاعظم مھمد علی جناح ، بتاریخ ۳۱ دسمبر ۲۰۰۹ ، شام ۶ بجے ۔ ، تعاون پاکستان سو شیل سنٹر شارجہ ۔
صبیحہ صبا ، صغیر احمد جعفری
۔۔۔۔۔۔۔۔۔۔۔۔۔۔۔۔۔۔۔۔
ALL UAE URDU MANZIL MUSHAIRAH in PAKISTAN SOCIAL CENTRE SHARJAH in connection with the BIRTH ANNIVERSARY of the QUAID E AZAM MOHAMMED ALI JINNAH , FOUNDER of PAKISTAN , on 31 st. December , 2009 at 6 pm.
Cooperation : Pakistan Social Centre Sharjah.
Contact : Sabiha Saba & Saghier Ahmed Jafri
saghierjafri@urdumanzil.com , sabihasaba@urdumanzil.com
Tel. 00971 50 4454036

UAE Day

http://urdumanzil.com/2009/uaeday/index.html

دبئی میں ایک بھرپور ادبی نشست ، صبیحہ صبا

دبئی میں ایک بھرپور ادبی نشست

صبیحہ صبا
مشاعرے اورادبی محفلیں ہماری تہذیب کا حصہ ہیں۔ دنیا میں جہاں بھی اردوبولی اور سمجھی جاتی ہے وہاں ایسی ان گنت تقریبات کا سلسلہ جاری و ساری رہتا ہے۔جس میں ہم خیال و ہم مزاج اور صاحبان ذوق خواتین و حضرات مل بیٹھتے ہیںاور ذہنی آسودگی کے کچھ لمحات اس تیزی سے گزرتی ہوئی دنیا سے بچا کر اپنے لئے محفوظ کر لیتے ہیں۔ایک بہت اچھی اورخوشگوار نشست کا اہتمام محبوب اختر غوری نے پرنسس ہوٹل میں کیا۔محبوب اختر غوری کا نام کراچی میں ہونے والے بڑے عالمی مشاعروں کے اہم اورگنائزرمیں لیا جاتا رہا ہے دبئی میں وہ اپنے بزنس کو کامیابی سے چلا رہے ہیںادب سے لگاؤ اور اردو سے محبت کا اظہار وہ اپنی گفتگو میں کرتے رہے۔اس نشست کا اہتمام رضوان ممتاز کے اعزاز میں کیا گیا تھا جو بحرین میں کئی ادبی تنظیموں کے سرپرست ہیں۔بحرین میں مشاعرہ اورگنائز کرنے کے سلسلے میں ان کانام بہت اہم ہے۔ثروت زہرا نے مشاعرے کی نظامت کی۔مریم فاطمہ نے تلاوت کی۔حمدباری تعالیٰ کی سعادت سید صغیراحمد جعفری کے حصےّ میں آئی۔ثروت زہرا نے نعتیہ نظم معراج رسول پیش کی اور اپنا کلام سنایا

ایک چپ کھائے گئی ہے مجھ کو

آگہی ڈھائے گئی ہے مجھ کو

میرے ادراک کی مجبوری سے

بات بہلائے گئی ہے مجھ کو

عبدالستار شیفتہ

بڑے سلیقے سے دیتے رہے فریب مگر

بڑے خلوص سے ہم اعتبار کرتے رہے

سید طالب حسین شاہ

موقع اسے کوئی بھی ہوا نے نہیں دیا

بجھنے مگر چراغ خدا نے نہیں دیا

سحر تاب رومانی

چل رہے تھے جس طرف ہم

اس طرف رستہ نہیں تھا

بات دل کی تھی دل سے ہو جاتی

بیچ میں تم دماغ لے آئے

حریم حیدر

اپنی باتوں کے حسیں پھول کھلاتے رہنا


اب ملے ہو تو یونہی ملتے ملاتے رہنا

اپنا پیمان ِوفا یاد ہمیشہ رکھنا

اب میرا کام نہیں یاد دلاتے رہنا

تسنیم عابدی

ہم سے آشفتہ مزاجوں کا پتہ پوچھتی ہے


کتنے باقی ہیں دئیے روز ہوا پوچھتی ہے

میکدے میں بڑے کم ظرف تھے پینے والے

آنکھ کو ساغر و مینا کبھی ہونے نہ دیا

مصدق لاکھانی

:۔ میری اڑان ناپنے والوں سے یہ کہو

میں آسماں کے وسط میں بے بال وپر بھی تھا

یوں تو بہت ہوئی تری چوکھٹ کی گفتگو

لیکن خطا معاف وہاں میرا سر بھی تھا

صغیر جعفری

پھر وہی حاصل سفر نکلا

جس پہ پہنچا وہ تیرا در نکلا

ہائے وہ دن کہ دھوپ اوڑھی تھی

پھر کہاں چھاؤں میں یہ سر نکلا

صبیحہ صبا

دل میں خاموش سا بیٹھا ہے خزانوں کی طرح

گونجتا ہے کوئی معبد میں اذانوں کی طرح

خیر کی فصل اگا کر اسے پکنے کے لئے

اک توکل پہ میں چھوڑوں ہوں کسانوں کی طرح

محبوب اختر غوری نے رضوان ممتاز اورشاعروں کا شکریہ ادا کیا اور اردو کے لئے اپنی خدمات کا تذکرہ کیا اورممتازشعراء کے بے شمار اشعار سنائے۔رضوان ممتاز نے اس تقریب ِپذیرائی پر میزبان کا شکریہ ادا کیا

ادبی خبریں

ادبی خبریں
رپورٹ: میم شین کامل، الخبر، سعودی عرب

(1)
معروف شاعر محترم سہیل ثاقب نےیوم اقبال کی نسبت سے ایک نثری مزاکرے کا اہتمام کیا جسکی صدارت معروف شاعر اور ادیب طارق محمود طارق نے کی؛ محترم نعیم جاوید، محترم ایوب صابر؛ جناب افضل خان اور طارق محمود طارق نے علامہ اقبال کی شخصیت پر اپنے اپنے مقالات پیش کءے۔ جبکہ سہیل؛ اقبال احمد قمر اور فقیر فیصل آبادی نے منظوم خراج عقیدت پیش کیا۔

(2)
محترمہ قدسیہ ندیم لالی کی مزاحیہ خاکوں پر مشتمل کتاب (مسکراہٹوں کی اوٹ سے) کوابو ظفر زین ایوارڈ سال ۲۰۰۹ کے لیے نامزد کیا گیا ہے اس ایواڈ کا ہر سال اجرا ممتاز مزاحیہ شاعر محترم شوکت جمال کرتے ہیں۔ انٹیلیکچول فورم کی طرف سے محترمہ کو اس پرمسرت موقع پر مبارک باد پیش کی گءی۔

(3)
معروف مزاح نگار اور شاعر ڈاکٹر عابد علی عابد کی مزاحیہ خاکوں پر مبنی کتاب (گستاخیاں) منظر عام پر آگءی ہے۔ الخبر کے ادبی حلقوں نے اس کے بے حد پزیراءی کی ہے۔

حمد باری تعالٰی

د کھادے پھر سے اپنا گھر دکھا دے
مرا سر صحن ِ کعبہ میں جھکا دے

حرم میں مرے سجدے ان گنت ہوں
جبیں کو روشنی سے جگمگا دے

در ِ اقد س پہ ایسی حاضری ہو
دیار ِ دل کو اک کعبہ بنا دے

ترا کعبہ مری چاہت کا مرکز
مری آنکھوں میں یہ کعبہ بسا دے

ترا ہی نام لے کر نیند آ ئے
مجھے اس خواب ِ غفلت سے جگا دے

یہ سارے بت جو ہیں حر ص و ہوس کے
مرے مولا یہ سارے بت گرا دے

ترے د ر سے تری رحمت سمیٹوں
فقط اپنا مجھے تو آسرا دے

کوئی بخشش کا ہو جائے اشارہ
گناہوں کو مرے مولا مٹا دے

صغیر احمد جعفری

پاکستانیوں نے عید کی شام ساحلِ سمندر پر منائی
تحریر۔ ۔صبیحہ صبا
عید کے بعد بھی ہیں دیس میں باسی عیدیں
اور پردیس میں دیتی ہیں اداسی عیدیں
یہ میرا ایک پرانا شعر ہے ۔جس میں میں نے پردیس میں رہنے والوں کی اداسیوں کا ذکر کیا ہے لیکن اب میرا خیال ہے کہ پاکستان کے زندہ دل لوگ جہاں چاہیں اور جب چاہیں پردیس میں بھی عید کی خوشیوں سے لطف اندوز ہو سکتے ہیں۔عید کی شام پاکستانی کلباء کے کورنش پرجمع ہوئے اور اپنے احباب سے عید مل کر خوشی مناتے رہے۔عید الاضحٰی ایثاروقربانی کا نام ہے پورا دن پاکستانی اپنے مذہبی فرائض کی ادائیگی میںمصروف رہے سنتِ ابراہیمی کی ادائیگی کے بعد شام کا وقت ان خاندانوں نے اپنے بچوں اورا حباب کے ساتھ گزارا۔امارات کے سجے سجائے خوبصورت اور دلکش ساحل پکنک منانے کے لئے بہترین تصور کئے جاتے ہیں۔بچے اور نوجوان اپنے ساتھیوں کے ساتھ دور تک پھیلے ہوئے ساحل پرخوش گپیوں میںمصروف رہے کچھ بچے اپنے ساتھ فٹ بال اور سائیکلیں لائے تھے۔خواتین نے اپنے پسندیدہ اشعار سنائے پھر صبیحہ صبا اور صغیر جعفری سے ان کی شاعری سنی گئی۔ایک خوش گوار ماحول میں دیر تک یہ فیملیز ساحل پر موجود رہیں۔ایک اہم بات یہ کہ امارات کی شمالی ریاستوں میں پاکستانیوں کے لئے کوئی مناسب جگہ موجود نہیں ہے جہاں وہ مل بیٹھیں اوراپنی تقریبات منعقد کر سکیںخاص طور پاکستانی اور امارات کے قومی دنوں کا منا سکیں ۔صغیر احمد جعفری نے حاضرین کے سامنے یہ تجویز پیش کی کہ یہاں بھی ایمبیسی کے تعاون سے پاکستانیوں کے لئے مناسب جگہ فراہم کی جانی چاہیے ۔ چاہے ایمبیسی فوری طور پر کرا ئے پر حاصل کرے جہاں پاکستانی اپنی سوشل ثقافتی اور ادبی تقریبات منعقد کرسکیںاوراپنی طرف سے پاکستان اور امارات کے قومی دنوں کو منا کر اظہار یک جہتی کر سکیں۔ تمام پاکستانیوں نے صغیر جعفری کی اس تجویز کی تائید کی ۔امید ہے اس تجویز پر متعلقہ افراد توجہ فرمائیں گے۔کیونکہ انسان کو اپنے جذبوں کے اظہار کے لئے مناسب موقع ملنا چاہیے۔ عید ملن پارٹی کو سب نے پسند کیا۔تقریب کا اہتمام مسٹر اور مسزامتیازاحمد،مسٹر اور مسزسید مکرم علی مجاہداور مسٹراور مسز کیپٹن نوید آزادنے کیا۔ممتاز پاکستانیوں نے ایک جگہ جمع ہو کر عید کی خوشیوں کو دوبالا کیا

ایوب خاور

ایوب خاور

جس طرح وادیِ پُر خار میں آہو نکل آئے
ہا تھ میں ہاتھ لئے تیرے خد وخال کے ساتھ
جانے کب آئینہِ جاں سے لبِ جو نکل آئے
دل کی چوکھٹ سے لگا بیٹھا ہےتنہائی کا چاند
اور اچانک کسی جانب سے اگر تو نکل آئے
برف کے ریزوں کی صورت جو نظر آتے ہیں داغ
یہ تیرے ہجر کےدکھ ہیں جو سر مو نکل آئے
وہ جو بے شاخ شجر تھے ترے رستے کا غبار
تو نظر آیا توہر ایک کے بازو نکل آئے
تو نہیں تھا تو یہ دل اپنی جگہ تھا کسی طور
تو ملا ہے تو کئی ضبط کے پہلو نکل آئے
خاور اس شخص کی اک اور صفت بھی ہے عجیب
جس کو چھو جائے اسی سنگ سے خوشبونکل آئے